Cobby's Paradise

Brake

2011-07-24T13:28:00.001+05:30

Zanlai a pel tawh a, MG Road phei ah chuan motor tlan reng an awm tawh meuh lo. Chak takin ka bike chuan ka lim phei par par mai a, zan len na a fuh bawk nge, ngaihtuahna tawi tup maiin ka hmalam ah enge awm ka ngaihtuah lo.

Hotel Aurora Towers thlen hma kawngpeng atang chuan rin loh lai tak maiin truck a rawn lang ta zuai mai le! Ka hma ah chuan rawn inhung nghal chat in, ka hmalam ah chuan thil pahnih tawn theih ka nei ta - A brake rap ila, ka ding chat anga, engmah harsatna awm lovin ka ding anga, him takin a hnu ah ka tlan leh thei. Chuti a nih loh chuan ka hma a truck chu ka su bur anga, ka thi chiang hle anga, ka khawvel nunna chu a tawp der ang.

Khawvela ringtute hringnun pawh hi chutiang chu a lo ni. Chak tha takin ringtu nun kan hmang mek emaw kan tih lai hian sual Setana chuan min lo chang reng in kan inrin loh laiin kawngsir atanga min lambun hun a nghak reng a lo ni. Min lo ambush a, Pa hnen tleng lo tawk tur vel a kan ringtu nun zawhlai tihtawp hmak hi a lo tum reng a lo ni.

Chu kan hmalam hunah chuan enge kan tawn dawn tih kan hriat lawk loh avang chuan inring reng tur kan lo ni reng a ni. Kan inrin reng nan leh chu harsatna kan tawn theih tur, boralna kan chunga lo thleng thei tur chu engtin nge kan lo inrin lawk ang?

1) A hmasaberah chuan ka bike khalh lai chu ka hrechiang in a brake man chak zawng te leh a balancing te chu ka hrethiam em em tur a ni a, kan kawng zawh lai pawh kan hrechiang tur a ni. Chutiang chiah chuan kan nun hruaitu ber Lal Isua hi kan belchiang in kan hrechiang em em tur a ni. Kan hriatchian loh Bike kan khalh hian engemaw ti tak a khawr riau hi a awl em em a, chetsual te a awlsam bik. Chuvang chuan Isua hi kan hrechiang tur a ni a, hrechiang tur chuan a chanchin kan zir tam a, amah nena inpawhna leh inpawlna tha kan neih a pawimawh a ni.

2) A brake rah thut a ngaih huna rap thut thei tura ka in rin reng a ngai a, hma lam ngun takin kan en ran tur a ni a, hnung lam emaw, ding lamah emaw, vei lamah emaw, ka mit ka len kual tur a ni lo. Chutiang chiah chuan kan hmaa lawmman awm chu en ila, sir lam atanga harsatna awm thei, midang min hmuhsit, deuhsawh, sawisel leh min nuihsawhna pawh a ni thei, chung zawng zawng chu engah mah ngai lovin Isua lam chauh kan en fan fan tur a ni. Kan hnung lama kan tlan pelh tawh thil ten min tibuai lo sela, kan sual kan hriatchhuah te pawh a ni thei, chung ai chuan hmalam a Kraws awm chu en zawkin hnehna puang zel in hmalam pan in inring rengin kan tlan tur a ni.

3) Speed limit aia chak in ka tlan tur a ni lo. Dan in a phal leh a tuk bak a tlan hi dan bawhchhiatna a ni a, kan ringtu nun ah pawh hian Pathian in Dan min pek te zawm in chu Kalvari Dan ang zel chuan kal ila, boralna lak ata kan him thei dawn a lo ni.

4) Helmet ka khum ngei tur a ni. Accident tawh palh thut pawh a ka nunna ka humhim theihna chu ka phaw - helmet hi a ni. Ringtute chuan misualpa lak ata kan him theih nana phaw kan inbel tur Bible in min lo hrilh - “...in kawng chu thutaka hrengin, felna awmphaw chu hain, remna Chanchin |ha inbuatsaihna chu in keah bunin ding rawh u; chung lo pawh chu rinna phaw la ula..” tiin.

A dang tam tak pawh la awm mahse, heng te hi a pawimawh zual, himna atana hriat reng tur te an ni.

Happy Birthday, Cobte. {Inhlanna}

2011-07-11T02:37:00.001+05:30

Birthday zawngah chuan a ropui ber a ni lemlo. Ka thiante leh ka chhungte bak chu khawvel hian ka piang a ni tih pawh min hriatpui ve hauh lo. Mahse, midangin min hriatpui leh hriatpuiloh lam, chutiang lam ka ngaihtuah tawh lo. Mihringte hunbi chhiara ka piancham chu kalo thleng leh ta reng mai. A ho zawnga ngaihtuah chuan a ho a ni - hringnun hi. Kan naupan laiin lehkha te kan zir a, kan lo thanglian a, kum te a lo tam zel a, kan lo puitling a, chhungkaw din a, khawsak rel a lo ngai a, kan lo tar leh a, he khawvela kan cham chhung chu a zo a ni der ringawt! Ho tak a ni!

Mahse, chutiang lo lam atanga ngaihtuah erawh chuan ropui tak a lo ni! Ramsate ang nilova Siamtu min lo ruahman dan te hi chhut chian chuan kan lo chungnun bik zia te hi! Sawi theih tam tak a awm ngei ang, kan ropui leh san bik leh thiam taka a bik taka duan kan nih na hi. Mahse chulam chu tunah rih chuan ka chhui tum a ni rih lem lo.

Ka nun ka chhui let. Eng thil ropui nge ka hnutchhiah?! Ka hre lo! A ni, ka hrelo takzet! Ka chhungte tan Fapa/nau chhuanawm ka ni em? Nau te tan entawntlak ka ni takzet em? Thiante tan thian ngainatawm leh rintlak, an innghah ngam na ka ni em? Ka ngaithuahna a buai! Khang kum ka hmanral tak zozai te kha, eng thil ropui tehchiam tih nan nge ka lo hman ni?!

Thiante zinga a huai pawl nih ve si loh chuan nungchang te hi a engemawti that ruk phah phian thei em mawni! Mahse, eng he hu ka nih ka hre lo! Mi tlaktlailo in tih chu ka inphal bik si lo; mahse mi tangkai intih chu ka ngam si lo! Misuaksual ka nih ka inhre lova, mifel in tih ngawt lah ka tim deuh si! Ka buai takzet! Ka nu leh pa leh ka chhungte, ka thiante min hmangaihna te hi ka chhanglet tha tawk em? Nge an tan phurrit mai ka lo ni zawk? Ka ngaihtuah ngai loh hlir ka inzawt vel a! Zawhna chhan har tak a lo ni tih tunah ka hrethiam chiah! Khang ka kum hmanral zozai te kha eng atan nge kalo hman!!!

Ngam lo chung chung leh nuam ti vaklo chungin ka ngaihtuah zawm ta - anih min siamtu Pathian tan ve hian le? Eng chiah nge maw ka lo nih tehreng ni! Ka ngaihtuahna- rilru leh ka engkim hrilh kher ngai lova min hriatpui kilh kelh tu; ka samzai zat nen lama min hrechiangtu hi! A beisei ka phak chiah em? Min siam hi a inchhir ang nge a lawm ang? Ka thatna lai ber leh ka sualna zawng zawng te min hriatpuitu hi ka kum hmanral tak zawng zawngah te khan a lawm ang em? Chhuan theih ka neih lohzia ka in hrechhuak uar uar mai!

Min hmangaih a, ka tan a nun a hlan a, KEIMAH JACOB VANLALTANA TAN LIAU LIAU HIAN!!! Mahse chuti chung chuan kei chuan a chang chuan ka pen bo san vel a, a chang chuan ka ngaihsak tawk lo vel thin! Ava zahthlak tak em! Ka tan A nun a hlan chu sawi loh, tun thlenga malsawmna min vur zozai te hi! Chhiarsenloh takmeuh! Heng te hi ngaiah ka lo nei mai maw? A ni thei lo! A rilru a lo va na dawn em! Khawvel ropuina leh nawmna te hi a rei loh tur zia leh chatuan ropuina - A mi te tana a buatsaih nena khaikhin chi pawh a nih loh dan hi! Ka hrethiam/hrefiah uai uai mai! A lo ni dawn tak maw!!

Chuvang chuan, LALPA, tuna tang chuan nangma tan ka nun hi ka hlan ve tawh ang. I duh duh dan in, i thu thu a awm turin i hnenah ka inpe e. Ka B’day present ah tun kum chu kemah ka rawn inhlan e. Lal Isua rawng bawl chauh lo hi chu he khawvelah hian hlimna leh lawmna tluantling a lo awm si lo...

Khawvel zawng leh keima nun ngei hi
Kalsan rawh tiin min lo ko reng si
He lei danah chuan hrehawm ve thîn mahse
Ka chunga i lawm chuan ka tan a tawk e..

Chhungte’n min tuithlar mah se,
Thiante’n min phatsan sela
Isua hlu hi kan humhimna
Lamah tawngtai ilangin.

Lei hausakna lalna leh ropuina neilo mah ila
Lal Isua neih hi ka tan a hlu zawk e.
A hmel chhiat tur ka phal lo,
A hming chuaia’n ka phal lo.
Engkima ka engkim chu
LAL ISUA chauh hi a ni.

JESUS CHRIST HAS SET ME FREE!!!!!!HALLELUIAH…..

Thil engpawh lo thleng se ka him a ni,
A kutphah ropui chhungah.

Ka dam na Kraws ka chhuang zel fo vang.

Khawvel mawina te lo vul mahse,
Ka tan zawng i hlu ber, Lal Isu...

Yeshu Mashi - Yeshua Band

2011-06-16T02:57:00.002+05:30

Hum gaye Hosanna,

Tu rajao ka hai Raja;

Teri mahima howe sada,

Tu hai prabhu hamara khuda.

He hla hi ka hriat hmasakber chu thianpa Collin a'n PMCF te Marathi Youth te nena joint fellowship kan neih tuma a sak khan a ni. A tir ah chuan ngaihthlak pangngai in ka ngaithla liam mai mai a, eng teh ual ah ka ngaihsak lutuk lem lo. Hemi Joint meeting kan neih zan hian anmahni Marathi thalaite chuan group zai an rawn perform a, he hla tho hi an rawn sa a, "A he hla ber kher pawh chu in va han dek lar teivet ve mawle," ka ti rilru ta vel mai mai.

Collin, singing Yeshu Mashi

Oldham Methodist Youth, singing Hum Gaye Hosanna

Chumi hnu deuh chuan zan khat chu internet ka browse kual vel na lamah he hla hi ka hmu nawlh mai a, Yeshua Band sak an ni tih te ka hre ta zel a, a lyrics te ka han en a, ngun takin ka ngaithla leh chhin a, nalh ka ti ta riau tlat mai! Chuan ka play nawn ta tluk tluk mai a, chumi zan la la chuan a hla thu en lovin ka sa chhuak thei ta nghal nghe nghe a. Ka roommate Thanpuia pawhin "He hla hi, a hma a ka hriat ai khan i play ka ngaihthlak tluk tluk hnu hian a ngaihnawm ka ti telh telh zawk" a lo ti ve ta hial a ni.

Kristian hla ka hriat tam tak te zingah chuan he hla hi ka duh ber te zing ami a ni ta hial mai! A thluk leh a hla thu in mil dan hi Thlarau in Cameron Mendes (Frontman: Yeshua Band) a pek a ni tih chu a hriat ngawih ngawih. Han ngaithla ve chhin mah teh:

Yeshu Mashi tere jaisa hai koi nahi

(Lalpa Isu, nangmah ang reng hi tu dang mah an awm lo)

Tere charno mai jhuke aasman

(I ke bulah van khi a la kun anga)

Aur mahima gaye sabhi

(Lei hian i fak hla a la sa ang)

Hum gaye Hosanna

(Hosanna tiin zai in kan fak agn che)

Tu rajao ka hai raja

(Lal zawng zawng te Lal I ni a)

Teri mahima howe sada

(Kumkhua in i ropui reng tawh anga)

Tu hai prabhu humara khuda.

(Nang chauh hi kan Pathian chu i ni e)

Pyare pita tune hum se kitna pyar kiya

(Hmangaihtu Lalpa, hetiang taka nasa hian nang chuan min lo hmangaih)

Hume paapo se chudane ko

(Sual lak ata min tlanchhuak turin)

Apne bete ko kurban kiya

(I Fapa kan tan i lo hlan tawh si)

A awmzia hre deuh riai ruai mah ila, ka hriatna in a tlin tak loh chinah chuan, post hmasa lam pawha an chanchin ka ziah nual tawh, Ramabai lama TBZ Misionary Nl. Bectei ka va bia a, a awmzia min hrilh kual vel in khitiang deuh khian a lo chhuak ta a a ni.

A hla hi sak a nuam a, a flow leh rhyme pawh hi literature lamah chuan a hniam lem lo ve khawp ang. PMCF (Pune Mizo Christian Fellowship) zaipawl pawhin he hla hmang hian vawi hnih lai chu rawngbawlna kan lo nei tawh a ni.

Yeshua Band hian vanneihthlak takin 3rd March, 2011 (Thursday) khan Pune a Nehru Stadium ah worship workshop-cum-concert ah an rawn nei a, thianpa Maroa nen kan va tel ve ang lawp lawp a, ka ngaihsan em em Yeashua Band te chetla vel chu ka mit ngei in ka hmu ve thei ta a, Cameron Mendes a hovin "Hum Gaye Hosanna" tiin Pathian fakin kan zai a, kan lam ho ta hial a ni.

Cameron Mendes, Yeshua Band

Thawhlehna leh a behbawm

2011-04-25T02:56:00.004+05:30

Tunalai thalaite kan nunphung sang chho zel ah leh khawvel hipna leh thlemna nasa tak karah, Pathian ngaihsak lova boralna kawng zawh mek a ni tel a kan pun telh telh laiin, kan hunpui Good friday leh Easter Sunday chu kan thleng leh a; ka facebook thiante, a tam zawk in Lal Isua tuarna tawmpuina leh inhlan tharna pual a an status an update a, zahpui lova an inpek thar na thu an rawn ziak ka hmuh chuan “Mizo thalaite hi kan lo la boral thui lua lo a nih hi a” tiin min ngaihtuah zui tir ta keuh keuh mai! Tukinah lah chutiang bawkin thihna hneh a a thawhleh thu, Sual leh Ramhuai ho tlawmna thu, an status update leh sms hmang te a an rawn tarlang leh sup sup khan, ka rilru a ti thlamuang sawt sawt mai nia.

Khawvelah hian mi ropui tam tak an lo piang ta a, mi ngaihsanawm zual te thukhawchang te, an hlaphuah te leh an thuziah chi hrang hrang te chu thangthar te’n kan nitin zirna sikul leh college ah te kan zir thin a. Poet te, thuziak leh thusawi thiam hmingthang te chu khawvel in a ngaisang hle mai. Martin Luther a hnehna thuchah ropui tak mai, Tv. Thanpuia’n PMCF fb wall a a rawn post te, Barack Obama a “Yes we can” speech, President atana lakluh a nih huna a sawi te...aa, tam mai. Chutih rual chiah chuan, heti hian han ngaihtuah ve teh le: Lal Isua thihna hneha a thawh leh khan, kha Easter Sunday hmasaber zing ah khan, thlan ruak a Vantirhkoh pakhat khan, hmeichhe ho hnenah khan thusawi ropui tak tak a nei. A thusawi chu tunah tawi te in i han zirchiang lawk ang hmiang.

“Hlau suh u...hetah a awm tawh lo, en teh u, an zalhna chu hei hi a ni. Nimahsela kal ula.....va hrilh rawh u” - Marka 16:6-7

1) Hlau suh u: He thlamuannu thu hi Bible ah vawi tam tak kan hmu a, Pathian in amah tihtute chu a awmpui tlat vang leh sual lak ata a venhim tlat a tiam vangin hlau lo turin min chah a ni. Pathian thuawih kan nih chuan engmah dang hi hlau tur kan lo nilove. Kan ISUA ngei pawh khan thihna hial pawh ngam in, hneh in, a tho leh ta si a! Tholeh Lal Isua chuan inthuam ila, engmah i hlau lovang u. Pathian chuan hlauhna thlarau min pe si lova!

2) En teh u: Pathian thatna leh malsawmna changtu kan ni a, a felna kan chunga a lantir hi kan hmuh hmaih hauh lo ang! Misual leh fel lo te pawh min khawngaihna a nasat zia hi kan hmu a ni lawm ni? Chu mai a la ni lo! A thiltihtheihna leh chakna hi kan hmuh ve atan a lo duh khawp mai! Hla siamtu pawhin “Nang hmutu ten an lawmzia hi thu in an sawi thei lo”, a lo tih kha. Pathian hmuh hi lawmna kim na a lo ni a nih hi! Hawh u, Tholeh Lal Isua hi thlarau mit in en tlat ila, hmufiah ila, thlemna leh sualna tinreng karah pawh amah chiah kan en tlat chuan hnehna kan chang ngei ang!

3) Kal ula: Mahni awmna hmun pangai ringawt nuam tih hi a chang chuan a lo tha ber lem lova, kan pen chhuah a kan hawiher kan tih danglam a ngaih chang te a lo awm thin. Tui hi luan miah loh a, a tlinna ngai a a tlin reng chuan a rei telh telh a, engatan mah a tlak loh ah a chang thin. Kan thlarau nun pawh hi chutiang chiah chu a lo ni! Tha ve pangai reng emaw kan intih chhung hian thiam takin sual hian chhung lamah nget a lo siam ve reng a, pawn lama a lanchhuah chuan chhe tak leh ngaihtuahawm tak a lo ni hman fo chawk! “An idle hand is devil’s playground” te pawh an lo tih kha! Chuvang chuan che chhuak teh ang u! Kan thlen chin ata hma sawn zel ila, awmna ngai ah awm reng lovin Tholeh Lal Isua chanchin thu hi khawvel hriatah i puang ang u hmiang!

4) Hrilh rawh u: Isua kha ngawi rengin a tho leh a ni thei e, mahse a thawh leh thu kha thuruk a nih Pathian chuan rem a ti hauh lo! Khawvela a la hre lote hnena hrilh darh turin min duh a ni. Theihtawp chhuah in, min chhandam tur leh, Setana leh ramhuaiho tlawma an awm thu te hi khawvel hriat ah hian i puang chhuak ang u khai! Mihring te leh thilsiam tinreng hnenah hian thawhlehna chanchin lawmawm hi i hrilh zel ang u. Kan thiam ang leh kan theih ang tawk tawk in. Nang leh keiin he Tholeh Lal Isua Chanchin Tha hi kan puanchhuah loh chuan tu kutah nge kan dah ang??

(As also on Peniel XXIV, Issue no. 1)

Thiamna - Lalpa tan

2011-03-09T20:44:00.007+05:30

Hmanlai kan Mizo nu leh pa ten an fate an zilhna chu, “Lehkha i zir loh chuan hlo i thlo ang,” tih a ni mawl tawp mai thin. Kut hnathawh hah nin vang leh fai sa a chawm thlakhlelhna pialral ngaihna theology in a a chawm seilen te nun ah chu chuan hna a thawk a, theihtawp chhuah in lehkha an zir mai thin. Kamding an lo ni ta cheng a, tam tak chuan khawvela a tha leh nuam an tih te chen in an hringnun chu mahni tawk te te a hlima in an chen thin a nih kha.

Thiamna hi a pawimawh asin.

Mahse chutiang mithiam te chu an lo ni, kan Van Pa pawh hian a tan a lo duh ve tho chu. Khawvel thila engmahlo mai Berampu ten chibai an buk laiin khawvel mithiam chungchuang te pawh khan chibai an lo buk ve tho mai! Thiamna leh hriatzauna te hi engmahlo mai a ngai a malmak a mausam ngawt theih a ni lo; he khawvela kan awm chhung hi chuan pawimawh vet vet tak an lo ni! Survival of the fittest an tih thinna ah kan awm a, damkhawchhuah leh nun khawchhuah duh chuan engemaw tak nih tum ve hi a lo tul khawp mai. Chu chu a mimal mai nilo, a hnam ang zawnga chhut pawh hian a lo dik a ni.

Pathian rawngbawlna zau zawk.
Pathian hian a rawngbawl tur hian mi te berte a hman lai hian, khawvel thil taka mi thiam tak te pawh hi a tana an inpek phawt chuan
zau zawka rawngbawlna kawng a hawnsak thin a lo ni. Chu thil chu hman atanga tun thleng hian a la dik tluan chhuak parh mai. Mahni thiamna a Petu tana hlan let chiah hian malsawmna te pawh hi Van lam khian vur a lo inring khawp mai.

Entirna pahnih lek i han tarlang teh ang:

Hruaitu ropui Mosia kha: Faroa fanua fapa a vuah a duh loh thu kan hria a, khawvela leader ropui berte zing ami a ni awm e. A hna hautak tak mai te kha Pathian hruaina in a kalpui thei zel tih kan hria. Mahse Mosia kha mimawl satliah mai a lo ni hauh lo nia! A hunlai a lal fapa enkawlna dawng, zirna in tha ber bera zir chhuak a lo ni tlat! “Tin, Mosia chu Aigupta rama mite finna zawng zawng an zirtir a, a thu-ah leh a thiltihah a ropui em em a.” (Tirh. 7:22). Khatia lal fapa anga enkawlna a lo dawn lawk vang a mi thiam a lo nih kha Pathian Chatuan remruat a lo ni. A thiamna avangin Pathianin a hmang a, hruaitu ropui a lo ni ta hial a nih kha. Hei hian Pathianin mithiam a mamawh tih a tilang chiang hle awm e.

Thuthlung thar lamah ve thung: Tirhkoh Paula, Saula ni thin kha, mithiam chungchuang a ni. Thuthlung thar bu 27 te zinga a zatve dawn lai mai ziaktu, Isua bula cheng tam ber te ai mah pawh a rawngbawlna zau zawk nei thei, Tirhkoh Paula kha, tun ang hunah hian awm ta se, kan ngaihsan ber ber dan tur chu a ropui viau ang. A hunlai a mithiam chungchuang, Rabbi Gamaliela ke bula seilian ngat, (Tirh. 22:3) Dan zawm lama Farisai, mi perfet tawpkhawk a ni (Filipi 3:5). An sakhaw inzirtirna ah sawiselbo a ni. A huaisenna leh thiamna te hi Pathian chuan A tan a lo duh ve hle ni tur a ni, a zinkawng ah lo chang in a lo chhun thluk tawp mai kha!

Thiamna chu engtin?

Khawvel thila thiamna hi thlaraumi inti thenkhatte hian eng ti zawng pawhin sawichhe thin mahse khawvela kan awm chhung hi chuan dik taka kan hman chuan a that lohna reng a lo awm lo a, Pathian pawhin a lo duh ve a nih hi ka ti thin. INTERSERVE Thanksgiving Bouqet a Missionary thenkhatte kha ka ngaihtuah chhuak: Thiamna ah chuan a then Doctor te an a ni a, a then Engineer te, a then lecturer te. An thiamna Pathian tana an hlan chiah khan rawngbawlna kawng pawh an tan chuan zau zawka lo inhawngin rawngbawlna chi hrang hrang leh hmun zau tak takah Pathian in a hmang mai thin a lo ni!

Thiamna mahni tan nilo, Pathian tana hlan let hian malsawmna chu a lo awm a lo ni! Lei hausakna kher hi malsawmna ah chhiar tur a nilo a, rilru leh thinlunga lawmna te, hlima leh thlamuanna, khawvel miten an neih phak loh hi Pathian chuan a mi te a lo pe thin a lo ni. Chutih rual chiah chuan kan thiamna kan uan pui a, kan chapo pui a nih vaih erawh chuan min petu hian min laksak leh daih thei a, kan phu tawk hremna in min thungrul thei tho bawk tih hria ang u. Inphah hnuai lovin inngaitlawm ila, mahse thiamna leh finna nei turin, Pathian tana hlan let tur leh Pathian tan pawh chhawr tlak tak nei turin bei ila, thiamna leh finna min petu chuan a let tam takin min hmang duh a, mal min sawm duh bawk tih hre nawn leh ang u.

Thiam i nei ve em?

Thiamna tih hian lehkha zir thiamna mai bakah kan talent dawn theuh: Zai thiamna te, thusawi thiamna te, thuhril thiamna te, lemziah thiamna te, infiamna lama talent kan dawn te leh pianpui talent eng thil pawh kan neih an ni thei ang. Pianpui thiamna/talent engmah dawng lo kan awm theilo a, zir chuan thiam theih loh pawh a awm hek lo. Enge i talent ve tih hrelo a tun thlenga i lo la thaw ve dep dep a nih chuan inngaihtuah chiang la, Siamtu'n i tana hmakhawsang ata a lo ruahman lawk chu enge a nih hriat tumin bei nghal ang che. Kan talent dawn theuh te hi a let a tih pun zir ang u. Engkim mai hi kan ta ni sela, Pathian pek let ah chuan a tawk zo dawn chuang si lova! Chuvang chuan i thiamna kha peipung la, a Petu che tan i hlan kir ve dawn lawm ni?

Ngaihzawng leh Lal Isua

2011-02-14T00:21:00.005+05:30

Mihring pangai nih ve tâk nafam chuan, mi pangai nih a, thil hrethiam tak tak nih hnu chuan, ngaihzâwng neih hi kan nuna bet tel tlat a ni ti ila, a diklo tam lua talo ve ang. Ngaihzâwng neih hi kawng chi hrang hrangin a thatna leh that lohna a awm tiin mî te chuan an sawi mahna. Rin dân leh pawm dân tamna khawvêlah hian a tha ti leh a ti lo engemawzat inkat nuk mah ila, a thatna hmuchiang a, hmufiah tak tak tute tân chuan neih tawh hnu a bansan leh hi a harsa ve tâwk niin a lang (a nei tawh te zawngchhang dan han thlir hian).

A eng a pawh chu ni se, ngaihzâwng neih dâwna pawimawh ber chu hmangaihna hi a ni. Hmangaihna tello chuan ngaihzâwng neih tum mah la, reilotê chu in inkawp rem thei mahna. Mahse a rei hnu ah engmahlo mai ah a lo chang anga, rilru natna leh lungngaihna i tahkhua tisei thlâwn mai tu a lo ni dâwn si.
I hmangaih tak tak vâng chauhin ngaihzâwng nei la, ‘mî te pawhin an nei alawm’ tih vângin emaw, ‘ka nei ve chin châk hrim hrim alâwm’ tih vâng ringawtin ngaihzâwng hi nei lovang che.

Mi thenkhat chuan hlauhna vâng te, an chunga thil thalo engemaw thleng tûr vâng tein ngaihzâwng hi an lo nei thîn fo. Mahse chutiang pawh chuan a daih rei chuang lo. Thiltha leh mahni hmakhaw ngaih vânga thlengtlawrzuana ngaihzâwng neih hi thil tih loh tawp tur a ni. Hmangaihna vangin ngaihzâwng kan nei zawk tur a ni. THIL ENGMAH DANG VANG IN NGAIHZÂWNG KAN NEI TUR A NI LO; NGAIHZÂWNG KAN NEIH CHHAN CHU HMANGAIHNA HI A NI TUR A NI.

Khawvêlah hian hmangaihtu neilo bîk nia inngaiin i lungngai a ni thei e. Mahse nangmah hmangaihtu che, i ngaihzâwng tûr chuan amah i pan hun nghâkin khawiah emaw nghakhlel takin a lo thlîr reng che tih hre phawt mai teh. Kan hmangaih te aiin min hmangaihtu te hi an hlû tia sawi i hre tawh thin ang. Nangmah hmangaihtu, nangman i hmangaih bawk nena rûn hmun lên dun chu a nawm lehzual zâwk i ring ve lo ami? Nangmah hmangaihtu tak tak i ngaihzâwng chu va hmangaih lêt ve rawh le.

A tâwp berah chuan i ngaihzâwng nêna in inkar boruak a that lehzual nân leh in relationship a lo ngeh deuh deuh nâna i tihtûr pawimawh hrang hrang te hi i hriatloh ka duh love. Inbiak tam te, thil tih tûr inhrilh tawna, in hriatpui thlap thlap zêl te, duat taka in kawm thin te, a tâna hun neih hrâm hrâm te hi in inkâr a that rei nân i hre reng tûr a ni. Tunah i ngaihzâwng nên chuan in awmna hmun a inang lo pawh a ni thei e, mahse nakin lawkah in la lêng dûn dâwn tih hria la, chumi hma chuan rinawm takin a tân awm phawt mai teh le. Ngaihzâwng nei reng chunga midang i CK pui zawr zawr a, a rilru natna tur thil i ti anih chuan a ngaidam bik lo maithei che asin!

I ngaihzâwngin a la hmangaih lai che leh hun tha i la neih lai hian hmangaih takin duat la, a tân rinawm la, zah thiam la, hmangaih dang neih san lovang che.

(Khai le, Ngaihzawng tih thumal zawng te khi Lal Isua tiin thlak la, han chhiar nawn leh chhin teh le...)

Lal lo piang chu!!

2010-12-14T20:00:00.002+05:30

Christmas in Pune- 2009

Bethlehem ah chuan a piang an ti;

Min Chhandam tur a lo ni.

Mahse hringfa zaleng zawng te hian

A lo pian chhan kan man lo phian!

Kan tan chu ran in chu thlang mah se,

Thinlung Lalthuttleng i kian ve ang;

Min hmangaih vangin tlawm tawh mah se,

Hnehtu A nih kan la hria ang.

Theih se khawvel zawng hriattir ka nuam;

Kan tan tlawm leh thih a huam;

Min tlan tur liau liau a lo kal hi

Hmangaihtu ropui a lo ni!

(Vawiin chu thla a sik tawh, vawt tawh deuh nen, lung a leng ve deuh thut a, pawna ka awm laiin, ziakna tur lehkha puan a awm loh vangin ka Cell phone ah chuan ka type char char a, heti hian a lo chhuak hlawl mai!! A nalh leh nalh loh chu thuhran, rhyme a thil ziah hi a nuam ka tia, blog update khat deuh tho bawk nen, ka rawn chhawpchhuak rawih mai anih hi.. :))

AW ROPUI BER HMANGAIHNA!!!

2010-10-25T14:20:00.008+05:30

Hmangaihna kan ti ta sa sa, khawvela a ropui ber hi hmaih ka duh bik love.

Hmangaihna hi chi hrang hrang a awm thei awm e. Nula & Tlangval inhmangaihna te, chhungte leh laichin te inhmangaihna te, nu leh pa te kher lo pawh, entirnan Ruthi leh Orpi inhmangaih ang te. Thian tha te inhmangaih pawh hi a lo thuk thei khawp mai. A chang chuan chhungte hmangaihna aiin a thuk thei zawk fo. Jonathana leh Davida inhmangaihana ang chi te kha (Chutichuan Jonathanan Davida hnênah, "I nunnain a duh apiang chu ka tihsak zel ang che," a ti a (1 Samuel 20:1-42)). Mahse heng zawng zawng aia ropui zawk chu, kan hriat sa reng leh kan sawi fo thîn- Pathian hmangaihna hi a lo ni!

(1) Phu loh HMANGAIHNA a lo ni.

Pathian min hmangaihna hi kan thawh chhuah emaw, kan that vang emaw a nilo a. Thilthlawnpek khawngaihna avang liau liau a ni.

Kan chakloh ber lai, sual ber lai, engmah tih theih kan neih loh laiin kan tan A Fapa min pe a, min hmangaihzia min rawn lantir a ni. (Rom 5:6-8)

Min chhandamna hi kan phu reng vang a nilo a, kan that leh fel vang a ni hauh lo mai! Kan chakloh ber lai leh engmah tih theih kan neih loh lai, bawlhhlawh ang lek chauh kan nih laia A nun a hlan atang hian min hmangaihna kan that vang a nih loh chian zia chu kan hrethiam thei awm e. Ama duhthlanna ang ngei leh kan tih tel hauh lovin min hmangaihin min lo chhandam reng si . Ka chaklohna leh ka tlinlohna te, ka chhiatna ber pawh hre reng chungin min lo hmangaih a, min chhandam a, chute a nih a hnu, engah nge ka rilru a lo mangan ve ngawt tawh ang!?? LALPA ka lawm e.

(2) Chatuan ata Chatuan thlenga HMANGAIHNA a ni.

Mihringte chuan kan phur thut chang chuan “kumkhua in ka hmangaih reng ang che” te kan in ti thla ve rawk thîn a, mahse kum em chu sawi loh, thla reilote ah a chang chuan kan inhmangaihna te hi a chuai leh mai si thîn.

Mahse Pathian hmangaihna ve thung chu chutiang a nilo -

LALPA ngilneihna erawh chu amah tihtute chungah chuan chatuan ata chatuan thlengin a awm ang a, A felna pawh an tuchhuan thlengin a awm ang. (Sam 103: 15-17)

(3) Hriatthiam phak rual loh HMANGAIHNA a ni.

Harsat buai leh manganna kan tawh chang te hian Pathian hian min kalsan ta nge min lo la hmangaih reng tho zawk?? Hnai love. Hringnun kawng bumboh tak kan zawh lai pawh hian min hmangaihna a lo dai ngai chuang hauh lova, min hmangaihna hi kan lo hrethiam lo mai mai thîn zawk a lo ni.

Tunah erawh chuan, aw Jakob-hote u, LALPA nangmahni siamtu leh aw Israel-hote u, nangmahni dintu chuan heti hian a ti: "Hlau suh u, ka tlan tawh che u hi; in hmingah ka ko che u a, ka ta in ni si asin. Tuite in dai kai lai pawhin kei in hnênah ka awm ang a; luite in dai kai lai pawhin a chim pil lo vang che u: meia in kal tlâng lai pawhin in kang lo vang a; meialhin a tialh hek lo vang che u. (Isaiah 43:1-2)

Ngun taka helai chang hi kan en chuan harsatna kan tawk miah lo ang tih a lo sawi hauh lo! Pathian chuan, "Ka hmangaih em che a, chuvang chuan nuam takin i hringnun chu ka hmantir ang che. Harsatna i tawk reng reng lovang?" a ti miah lo. Mahse, harsatna lui lian leh meipui hial pawh kan paltlang lai pawhin kan kiangah a awm reng ang tih erawh min tiam zawk a lo ni.

5) Uire hmang pawh a HMANGAIH reng.

Hosea 3:1 ah chuan Pathianin uire hmang pawh a hmangaih reng tho tih a zawlnei kaltlangin a lo entir a. Hmangaihna hriatthiam har tak zawng a lo ni e! Duhtak te uire hnu ngaihdam harsat vang in a ni lawm ni “whiskey lullaby” hla te a lo pian chhuah hial! Ania sin, mihring hmangaihna nen chuan kan Pathian hmangaihna hi tehkhin phak rual a lo ni lo!

Mihring te min hmangaih nasa khawp mai. Buh lem leh buh tak chu lo to za rawh se tiin mi tha leh mi sual pawh ang khatin an chungah nni a chhuahtir a. Amah tihtute leh amah haw tut e chungah pawh angkhatin ruahtui malsawmna a sur tir thîn a ni.

Enge kan tih ve tak ang???

Kan hmangaih let ve tur a ni. Hmangaih let ve hi kan ba sa hrim hrim. Min hmangaih hmasak tawh vangin. Nunna hial hlan tawh khawpa min hmangaihtu chu kan hmangaih let ve mai tur a ni. Thupek ropui ber leh pawimawh ber a ni, Pathian hmangaih hi. (Mathaia 22:37 & Deuteronomi 6:5)

Hmangaih let dan: A thupek kan zawm leh kan mihringpuite kan hmangaih hian Amah kan hmangaih tihna a lo ni. A thupek zawm leh midangte hmangaih hi thil ka kawp tlat a ni a, then hran theih a ni lo.

Khawvel mihringte hian hmangaihna nei vek thei ila chuan khawvel nuam tak kan siam tihna a ni ang. Inelrelna te, initsikna te, insawichhiatna te, chapona te, sual zawng zawng hi a lo awm na chhan chu Hmangaihna tel loh vang a lo ni zel. Chuvang chuan kan thinlungah hian tunah hian hmangaihna nei turin Pathian i sawm thar leh ila. A hmasa ber a kan hmangaih tur chu Pathian a ni ang. A dawt leh ah chuan chumi tlukpui tho chuan kan mihringpuite kan hmangaih bawk tur a ni.

Hna reng reng pawh hi ngaihtuah chian a mahni mihringpuite kan hmangaih vanga kan thawk anih chuan hlawh leh mahni lam kan en toh lo a, hna hniam tak anga lang pawh hlim takin kan thawk thei fo thîn. Hmangaihna tellova hna kan thawk anih erawh chuan eng hna mah hi hlim taka thawh theih a lo awm hauh lo.

Chutiang zelin kan politician te pawh, ram leh mipuite hmangaih takin hna thawk se chuan kan ramah corruption leh buaina hrang hrang tuna kan tawh mek te khi kan tawk hauh lovang. Mihringpuite hmangaih hi Pathian hmangaih na a ni tih hrechiang tu leh rawngbawlna a ngai mai nilo, rawngbawlna a ni tih hria a ram hruai hna kalpui tura politics lama lut awmse chuan kan ram pawhin tun ai chuan hma chu a sawn thei deuh ang..

Sawi tur tam tk a awm ngei ang, a bik takin kan ram kan thlir chuan. Engineer te, Contractors te, Zirtirtu te, leh eng hna pawh thawktu te hian, hmangaihna nena kan thawk a nih chuan hlimna hi pathian hnen atangin kan dawng ngei ang. Mitin kan hlim tklang ang a, kan rampawhin hma a sawn ngei ang.

A tawp berah chuan Krista hnenah khenbehin ka awm ta; nimahsela ka nung a ni; keimah erawh chu ka ni tawh lo. Krista chu keimahah a nung zawk a ni; tin, tunah tisaa ka nung hi rinnaa nung ka ni - Pathian Fapa, mi hmangaiha ka aia inpetu rinnaah chuan kan tih theuh theih nan Pathianin hnenah a tharin i inhlan nawn leh ang u.

DERTHAWNNA TENAWM;(I hming chu hmeichhia a ni!)

2010-09-02T20:39:00.003+05:30

He thuziak hi, ka thian nula leh hmeichhe fel tak tak te huat atana ka tih a ni lo a, rilru nat lama lak chi poh a ni lo. Tu emaw hmeichhe pakhat, ka pawi khawih tu leh rin har ka tih tawh takzet, ka hmangaih si, min hmangaih si lo tu tan ka ti a ni zawk e.

Hmeichhe pakhat a awm a, amah chu a fing lo a ni. He hmeichhia hian a ni, rilru ti hah a, hringnun zinkawng bumboh tak zawh lai ti buai zo vek chu! Ka pawi khawih hi a tum ve hrim hrim em ni tih mai turin ka rilru hah na tur thil tam tak min siam a; ka tih loh dan apiang chu a pawm dan a ni deuh ber thîn mai niin a lang.

Lawng min tuk pui turin ka sawm a, mahse ani chuan lawng chhuat chu min cheh pawp sak ringawt a, hlim takin min kalsan daih mawle! Tuifinriat zau tak mai chunga lawngleng a in kar puiah ka sawm leh a, mahse li thuk kan thlen lai tak maiin tuipui chhungah chuan min zuan luh san ta daih a, min ti hrilhhai kher ngei mai. Kan khaw daia lui pakhata nghakuai min chiah pui turin kan in be fel vek a, mahse a hun a lo thlen chuan midang nen chu lui chhakah chuan len min lo den san daih a, riangvai ngawih ngawihin min siam phah ta hial a ni!

Thu tiam a awlsam ang tluk zetin sut leh pawh a awlsam asin, he hmeichhia hian! Tukthuan ei laia a thil tiam chu chawchhun ei hma ngeiin a sut leh ang tih beisei la, i beisei sual hauh lovang. “Aw, a rem mai e,” a tih chu, “Thildang, chumi khami chu, a ngai leh sia, a rem leh lo mai. Minlo hrethiam hram mai rawh” tiin reiloteah a sawi zawm leh thîn tlangpui!

Thlengtlawrzuan hi sawifiah ngai ta se, amah hi entirnan pe ila, a chiang ber hial maithei. Khaw pakhat ah a kal a, rawng sen nalh a ti ber a; mahse a khaw kal lehnaah chuan a var an lo uar leh tak em avangin rawng var chu nalh a ti leh ta ber zawk a! Mi pakhat hnenah bawng sa tui a tih ber thu a sawi chu vawksa ngaisang deuh a tawn chuan vawksa tui ti ber ang ziazangin a khawsa leh lawi thîn si! Chi thlum mum a mamawh laiin a pe theitu chu khawvela a ngainat ber ang ziazangin a be tha a, mahse chumi hnu lawkah darkar sawm leh pali pawh a pelh hma hauhvin chu thil petu leh harsa em em a amah pan tu chu theihnghilin leh chu thil petu in a sawmna ngai pawimawh duhlo lui tlatin hmawng thing ler a’n chawchhun a fak san hmiah hial mawle!!

Nun nghet fek fawk nei awm hiala mawi mah ni se, a pumrua leh hmel en mai chuan puitling ve uaih tawh angin lang mah se, rilru lamah chuan luang thli chhem nghin mai mai ang vel nen hian a khaikhin theih deuh ber maiin ka hria! Rilru leh tihtakzeta a thil sawi pawh hi reiloteah chuan inthlahrunna leh nuamlo tih der na eih awm miah lovin awlsam takin a sut leh hmiah thei mawle! Thiam ang tawk leh theih ang tawka ruahmanna kan siam dun ve, a tak ram chang leh talo tura a tih thmaral nasat zia hi!!!

Chutichuan heng thu zawng zawng khaikhawmna chu hei hi a ni - “Derthawnna tenawm; I hming chu Hmeichhia a ni,” tih hi!

Mahse, nun derthawng tak nei mah ni la, engah mah min ngaihsak duhlo mah la, kei chuan ka hriatloh hlan khan kalo hmangaih hman reng si che a, chu tal chu lo hre ve la ka ti a ni. Ka nun khawharna min siamsak leh ka rilru min hliam na hi a dam har ve tawh viau ka ring.

Tuna a chhia zawng zawng ka puh che erawh hi chu na i ti ve viau a nih pawhin ka rilru i tihnat na nena tehkhin chuan a bei tham viau ang tih i hre dawn nia.

A rem si lova!!!

2010-08-17T23:07:00.009+05:30

Hmangaihna kawng bumboh tak zawh tan tur chuan, zawhpui tur neih a ngai. Mahse chu kawng zawhpui tur chuan nang chu ka tan duhthusam mah ni la, ka rilru a ka vei reng thu che hi ka hrilh ngam si lo che. Ka hrilh che chuan kan in kawmngeihna leh kan in thianthatna in a tawrh phah ang tih ka hlauh vangin ka insum hram hram thin zawk. (Dawihzep min ti em?)

Hring ka chan chhung hian nang tluka ka lung dum zo hi ka la tawng ngai lova, ka tawn leh theih pawh ka inring tawhlo hial asin. Tuna min ngainat der ve na leh min kawm nel ve peihna hi inthianthatna satliah ang mai ah i ngai ang tih ka ring a, duh hle che mah ila chan loh khan a'n rin loh leh beisei loh tak mai a min chhan hlauh chuan ka tan he hringnun hian awmzia a nei thei tawh dawn si lova, chuvang chuan a ni, ka ngawih mai ni.

Ka hmangaih thu che hi hrilh ta che ila, nang chuan inthianthatna piah lama min hmangaih let ve thu a min chhan ka ring ngam lova, ka ring lo phal bawk si lo. Ka rilru hi a buai zo ta a ni! I tel lova hringnun hman hi ka zuam hlawl lova, mahse chumi ep chiah chuan, hringnun thawnthubu a kan lan dun theih nana ka beih na lamah i lungnihlohna ka thlen hlauh chuan ka in ngaidam thei tawh dawn si lo! Ka dinhmun ah hian ding ve ta la, nang pawn thlan tur ber i hrethiam bik lovang tih ka ring. Bei ka ti sei ngam lova; mahse beidawn ka phal bawk si lo! Fam lova dairial chan ka zuam lul lo!

Hetiang khawpa ka rilru i tihrehawm thei mai hi a mak ka ti hial asin! Nang anga belhchian dawl tleitir hmeltha hi an tam ka ring mawlh lo, khawvel hrut chhuak mah ila. I nui hmel mawi leh i anka nem thlum dam diai mai chu ka hringnun khawhar leh chhawl hal tan hian chawlhna tuikam nuam a lo chang thin si a! Nang anga rilru tha, nunnem leh zaidam hi ni vek ila, khawvel ah hian huatna leh initsikna te hian hmun a chang hauh lovang! I mitmeng mawi tak maia min melh lai te khan, ka nunna hi min laksak dawn pawh ni se, thlamuang takin ka kal mai tura.

Mahse chung i mawina leh i thatna zawng zawng te chu val lungmawla tan hian chuan engmahlo mai a lo ni si maw? Tawrh thiam a har ka va ti tak em! leng dang tana par ang vul mai tur chuan ka phal lo che asin mawle! I tan chuan engpawh ka huam ang. I hlimna ka duhsak ber che a, mahse chu i hlimna chu midang pek che nilovin keima pek che ni se tih hi ka duhthsam a ni si! Hmangaihna hian hma a lo sial thei ve a nih dawn hi tih nangmah atang hian ka inzir chhuak ta hial mai!

Eng pawh chu ni se, ka tan tawn lovah tha hle mah la e, ka dawn lungruk lairil hmangaih biahthu chu, ka hlan ngam ta si lo che a, tawrhthiam dan lo in zir mai ta'ng i. Ka sakhming i nghilh pawh a ni thei e; mahse ka hmangaihna che erawh hi chu khawngaih takin kumtluanga i thinlunga vawng reng turin min tiam hram teh; chu chiah chu ka ngen a che. Khiang awiin zamualpui pawh liam mah la, ami tawnah hraileng chawi mah la, i thinlunga vawng reng turin ka ngen che a ni. Chutin ka damlai lunglawm pawh a kim ve mahna.

Hun leh ni te lo ral zelin kumsul tam engzat pawh vei mahsela ka hmangaihna che hi chu a reh dawn tawh si lova. Nangmah ngaiin damchhung hun ka hmang tawh dawn si! Ka thinlungah i cham reng anga, ka hmangaihna che hi engtikah mah a dai tawh dawn lova, dai tura'n ka phal hek lo! Kan inkawp rem theih dawn loh vangin ka hlan ngam lo mai che a ni. Chuvang chuan ka tih theih tawk, fanau maltluan chawi a hlim te a i lungdumtu nen hringnun par tlan dun turin duhsakna ka hlan mai ang che.

Ka hmangaihna biahthu han hlan ta ila
Engtin min chhang ang maw tleitir lenmawiin
Min hmangaih hian kei zawng ka ring si lo
Len thiam a har ka ti nui mawi hmeltha

Mahse e ka hmangaih min nghilh bik suh aw
Nangmah ngaia damchhung hun hmang tur hian
Mal ka sawm che khiang awi i chana thlengin
Dam ten leng la zantin mangtha

Hun leh ni te lo inher danglam zelin
Kumpuisul engzat pawh lo liam mahsela
Ka hmangaihna a chuai dawn chuang si lo
Ai ang i cham reng dawn thinlai rukah

Ka hmangaihna thamral an ka phal nem maw
Mahse i rem thei si lo maw lalnunnem
Engtin tuar zel ang maw i zunleng ngaih
Khuanu ruat loh di tawn a har ngei mai

An Vui Liam e!!

2010-07-25T22:14:00.013+05:30

Pathian hmangaihna chhangtute nun hi i dawn chiang ve tawh em? Leiah hrehawm pawisa lova an hringnun mangtha in an hun pum an tlantu tana an hlan hi! A taka mit ngeia hmuh hian thil chu a lo fiah.
TBZ in Ramabai (Ambernath) a Biak In thar an hawnna (24/7/2010) a ka tel ve atangin thlarau chawtak ka dawng ka ti lo theilo. Chumi kal zela ka rilrua thu awm chu ka puangchhuak ve mai a ni e. He tuziak hi Ambernath hmuna TBZ Missionary te tan ka hlan e.

TBZ Missionary zaipawl an ni. Engvang in nge an in lum leh nuam kalsana he hmun hrehawm, khawhar leh tawp takah hian, nung trok2 in, hnamdang berh ve tak tak te leh midang pawhin an ngaihsakloh ho bulah, ngah lo leh nghei chiah lo chang2 in, an awm duh mai le? Khawvel nawmna thlahlel se chu an tan nuam a tam ve thei tho asin. An Biak In zim te a hlim tak leh tui taka an zai lai te, phur tak leh uar taka Pathian an fak laia Nl. Bectei (missionary) in thiam taka hla chang a sawi leh zai a han hruai ka hmuh te khan ka ngaihtuahna a hruai thui hle a, ka hnuk a ti ulh hial asin!

Hmangaih vanga a nun hlantu kohna chhangin
Lei hringnun ropuina leh mawina te an hnawl a;
An lei taksa hmangaihnain hmun a chang lo;
An vui liam e an hmelthatna an damlaiin.

Mahse an kohna dawn chhangin leia hlimna leh lawmna leh nawmna te chu engmahlo mai a ni tih an hrechiang a, chu kohna chu lawm takin an chhang zawk a lo ni.

An lei taksa chu reilotea ral leh mai tur a ni tih an hre reng a, mahse chu ral leh mai thei an lei taksa chhunga ral ve thei tawhlo leh chatuana awm reng tawh tur an thlarau chan tur chu an chiang zawk si.

Chuvang chuan an lei taksa leh an mawina te, an hmelthatna te chu vui liamin an tan chatuan Pathian remruat lam chu an en tawh zawk a, lei mi te’n mi â an ti; Khawvel mi ten an hrethiam lo. Mahse, a rawng an bawl thina hian a la chawimawi dawn tih an hriatin an tana Lallukhum chhe theilo chu beisei zawkin hmalam panin an kal zel zawk si.

Ka rilru a khawih, ka hnuk a ti ulh asin, an sak lai khan.. An inpekna ropui leh thuk hi,,, Sawi hian a fiah zo miah lo.

An vui liam e an run in nuam zawng pawh;
Chenna ngailoh runah siang an lawi e.
Suihlunglenin kian zai rel lo mahse,
Kir zai rel lo ten leihmun hnutiang chhawnin
An lallukhum chu an tan an dah tawh si.

An Tlantu fakin hlim takin an zai a, lei nawmna leh ropuina an thlahlel lo. He lei hlimna leh ropuina hi engmahlo mai a ni tih an hrechiang. Leia an chhungte leh an thiante, an in leh lo te leh nawmna an tawn ve tur hrang hrang te chu an kalsan ngam a – mahse, an chiang a ni. Hmun hrehawm leh nawmna awmlohna hmunah an kalchhuak a, thosi leh dosi karah a chang chuan riahrun an rem te pawh a ngai thn. Khawvel an thlîr chuan kir leh te pawh an chak ngei ang. An kalsan tak leh an hnuchhawn tak te an thlir chuan an lung te pawh a leng ve thîn mahna. Mahse lunglen sawiin kir zai an rel chuang lo. An tana Vana Lallukhum chhe theilo an thlir tlat tawh zawk avangin. Tuna hrehawmna reilote an tawrh tur chu nakina nawmna tur nen chuan tehkhin rual a ni lo. An awmna lei hrehawm mah se an thinlung erawh a hlim asin.

Lawmthu sawi tur ka lo ni e Isua hnenah.
Ka chanvo ve ka rawngbawlna ka thlir chang hian
Engkim mai hi hmangaihna vang alo ni e;
Min dahna hmun ka tan reng hian a lo tawk e.

Leia hrehawm leh harsa taka an khawsakna avang hian khawvel mithmuhah chuan mi te/hnuaihnung an ni. Mahse Lei leh Van Siamtu rawngbawl an ni tih an hriatin tling lo taka a rawng bâwl ve thei tura a siam hi an lawm a, an thinlung a hlim a, chu hlimna chu pawisa a lei theih a ni lo – Pathian pek a nih zâwk avangin. An chanvo leh an lungngaihna te, an khawharna te an thlîr chuan an tana Tlantu’n Kraws lera Hmangaihna vanga a lo tuarna an hmuh hmaih hauh loh avangin an lâwm a, hmangaih lêt ve hi an tih theih tawk a ni tih an hria a, a rawngbawl leh amah fak hi nuam an ti zawk hle a ni. Nunna hial hlan khawpa hmangaihtu tan chuan lu chum ban chum pawh an ngam a, an nunna hial pawh hlan ve an huam a, khawi hmunah pawh, a hrehawmah leh a nuamah pawh, A tana thawh ve chu an bat a ni tih hria in lawm takin an thawk zel zawk a lo ni.

Thawhlehna ni lo thleng tur chu nghakhlel takin
Dawhthei takin ka thlir reng e Van In nuam chu;
Ka lei taksa hrehawmnate chu kalsanin,
Ka nghahhlelh Lal Isua ngei chu ka kuah tawh ang.

Hrehawmna leh tahna ram an pelh hun chuan Chawlhna nuam an tan buatsaih lawk a ni tih an hria a, nghakhlel takin chu hun chu an thlir zawk a lo ni. An hrehawm tawrh te leh lungngaihna leh khawharna te hi tam hle mah se chung hrehawmna te chu nakinah an thawnthu sawi nuam ber tur a la ni dawn tih an hria a, an tlantu a rawng an bawl thina hnenah ngei chuan hlim taka an zin ram chanchin hril hun chu an nghakhlel hle a ni. Chutih hunah chuan lungngaihna leh hrehawmna a awm tawhlo ang a, thlamuanna famkim neiin chawimawina Lallukhum nen an Tlanu chu an la kuah ang a, fakin an la chawimawi kumkhua tawh ang.

Nang leh keiin kan neih loh thlamuanna leh hlimna leh lawmna zawng zawng te hi, an thinlungah an nei vek. Chung pe theitu Pathian ropui ber rawng an bawl tlat avangin. Pathian an chawimawi a, nakina an ropuina ni a lo la thlen ve hunah an fak Lalpa bulah an zin ram chanchin hlim takin an la sawi ang.

Kan kara hmangaihna

2010-07-03T13:59:00.006+05:30

Hringnun lamtluang ka dâwn châng hian
A mak ka ti! Ka sawi thiam lo!
Ka lung i dum zawh ang reng hian
Leng dang lungdumtu ka tawng lo;
Theih se hlim te’n leng dunin
Nui dun ila, Khuanu hualhimin.

*Kan kâr hmangaihna lo awm hi
Siamtu remruat a lo ni ka ti;
Kan tâna a remruat a tha si;
A hnêna lâwmthu sawi tûr kan lo ni.

Kan rûn hliapah i lo lawi chuan
Thinlai lunglâwm a kim ngei ang.
Siamtu lung kan dum zawh bawk chuan
Kristian chhungkua kan din ngei ang;
Chutin fanau maltluan chawiin;
Min tuahremtu Siamtu chu fakin.

Duhthusam lânu i lo ni!
I bahsam sei, i nui mawi nen;
I siamtu tan i chhuanawm si;
Lainatna ngah, nungchang mawi nên.
Rinawmna i vawng reng ang aw!
Thianghlim te in leng dun zel ang aw!

Ti ve leh rawih mai anih hi. Rhyming scheme khi hmuh hmaih lo la. Inhmangaihna hla hi kan ngah a, Mizo te hian. Mahse Pathian tellova inngaihzawn hi a tha ber lem lo tih thailanna te pawh a ni ve pah bawk e.
Belh leh paih tur duh tan hun kan hawng ang.. A thluk chu, siam chak kan awm chuan in hrilhhriat a, siam pop mai tur. A thluk siam vel hi ka chemkalna a ni vaklo a..hehe..

Ka nu tan (Mother's day pualin)

2010-05-14T01:19:00.001+05:30

Ka nu, ka lâwm e;
Phurrit mai ka la nih atang hauhvin,
Sawisêl lovin min lo nghâkhlel zâwk a,
Nikhua ka hriat hmâ atang hauhvin
Hmangaih kutin nêm te’n min chawi a;
Hriatthiamloh ka neih te
Zaidam takin
min hrilhfiah a;
Ka sualna leh fellohna te chu
Dawhthei takin hmangaihin min zilhhauva;
Thinrima ka tihtauh châng te paw’n
Nang chuan hlim takin hriatthiamna nên min lo nghâk reng thin si!
Mihring pangngai tak ni tûrin
I thiam ang leh theih tâwkin Ka tân i bei tih ka hria.
Ka lâwmna ber erawh chu maw, nu, hei hi a ni:
ISUA hnêna min hruai thleng hi..
Chuvang chuan maw, nu,
a tlai hmâ ngei hian,
tunah hian thil te te ka hrilh ang che:
KA NU, KA HMANGAIH CHE.

Mì$ty tãn

2010-03-17T17:17:00.001+05:30

Each day, in my life, I meet someone new;
Despite many, people like you are few;
Linger in my heart, the sweet smile of you,
Lost without thee, like lonely sailboards' crew.

Every time I think about that day we met,
Never shall I forget how since then 'was mad!
Seeing your beautiful smile, never shall I regret;
Indeed, all your charms and beauty- so perfect.

Living own life: far far away from each other;
Verily I say, even we may drift farther,
Every moment of my breath, but, will remember
Real memories of your cuteness: regret never.

Murva iangin thangvan len thiam ila
I hnen thlen hma ka thla ka parh tura;
Sirtiang sawn dun zai rel a rem lawm ni?,
Tawn leh ni her chhuak leh thei se ka ti!!

Mangtha Mai aw, Vanlal

2009-12-14T15:01:00.003+05:30

1) Muang leh hlim te'n kan lenlai ni te
Ai ang a cham reng asin thinlaia'n
Ngaihlai kan bang mawlh lo- i tawna'n
Tap ruaiin kan rawn au leh che.

*Hlim te a tlaikhua var za leh in
An sawi damlai pialral chen leh ka nuam
Mahse kohkir rual i ni tawh si lo maw!
Ar ang kan vai asin i lenrualte

2) I phung leh chang te'n kan ngaithiam lo
Aw enga'n fam khawpui i lawi mai le
Vanglaini uaiin la chul si lo
Ariang kan chan dawn mawlh lo che

3) Nau ang hlim te'n kan nuih za lai te
Lam kan thai lai te- kan vangkhaw tuala'n
A thar leh thin; nang ngaih tizuala'n
Lam ang lo let leh hram ta che!

Ka thian kawmngaih em em, VANLALHLUTA, lenna tlang a dan lai leh inrin loh lai taka December 1st 2009 a accident vanga fam khawpui min lawi san tu pualin..
Hlim takin dam te'n kan intawng leh anga tia beiseina chu a thamral ta mai si a!
Tlar tin thumal bultanna theuh khi chhiar thla la, a hla thupui alo chhuak ang.

Pangpar! Mawi tak chu!

2009-09-11T21:54:00.009+05:30

Traffic light chu a sen leh ta va mai. Tlai tawh nak alaia han tan khawmuan leh rih chu! Ka lunghnur rilru hle mai. Hui hams! Sana chu a khat tawkin melh deuh zut tawh ania. Rilru kaptu awm kur bawk chung si chuan tih theih dang vak nei hek lo i, suangtuahna virvel paw'n hna a thawh that theih loh vang te pawh ani fahmiang - kan piah lawka rangva sethlam khawr chhe fir fer ding sep sep, tawt taka rem leh rem lova rem khawm, tu'n ka ui ka ar an tih loh ho inbenbelna slum area te chu thlir kual vel pahin signal light hrin hun chu nghak ran mai.

PANGPAR chu! Ani, he hunah hian alo ni, suangtuahna system rawn sawi nghing lawih khawpa thupui lo thleng thut chu.. Rin loh lam daih atangin! Inthlahrung tih hriat fahrana dim tak, hriatloh hlau si a ka kekawr rawn pawt feih feih tu, ka chuanna rickshaw bula lo ding chu - chu kutdawh naupang - PANGPAR zuar chu.

Pangpar bawm thawnthu ka hria. Boy over flower leh Girl over flower phei chu tlaivar paw'n ka en peih mahna(mutthluk loh hlauh chuan!). Nia, phai khawpui atang pawh hian parmawi tin vulna Zoram in ani lung min len thin chu. Mahse, pangpar azawngah he pangpar ber kher!!

A kengtu naupang chu: a thuam inbel chu a chhuanawm hranpa lo. Hak tur dang a nei lo pawh ani mahna; thler lo lai zawng chu a bal bel hlur - vaivut nge, eng ek nge, eng thli nge??!! Ka hrelo. Rei tak inbual tawh lo tih a taksa hmel hmai bal fip fep leh khak rang paw pheu mai atang chuan a hriat a. Ehe! Kelawngin ani alo tal vel hi, metal road ah lehnghal! A lum tehreng nen..

Chawkawpuar mumal hmulo ni awm a mawi mah ni se, a kuta a pangpar ken - chu ngei chu - min rawn zawrh chu! A kengtu nena khaikhin rual lohva mawi - Siamtu duan lawk ang diama a parmawina thuam famkim inbel chu! Chu ngei chuan ani, chu naupang chu beiseina pe a, tu in emaw an leisak huna a pumpui hnawhpuarna pe thei tur chu. Siamtu duan ang lanchhuahpui tawp a, iai lo leh mawina dang thlahlel lo, chu pangpar ngei chu.

Chhiatni thatni ah a mawina a dang lo. Khawvel miropui ber ber te awmkhawm na a a mawi tluk zet thovin khaw chengker dai kil kawm karah pawh a mawi ve tho bawk. Ramhnuai pilril, ngawpui chhah kar, tu i khaw hriatlohna hmunah a par a chuai chuang lo a; dawrpui hulum lai leh mi te'n an thlir luai luai na hmunah a inchhuang hek lo. Danglam chang nei hringfate hian amah ah hian zir tur kan va ngahtak em!

Ti hian ka ngaihtuah zui ta keuh keuh a: Krista neitu ka nih cuan khawi hmunah pawh awmin eng thil pawh ti ila, keimaha nung Krista parzu chu midang te hian keimah atang hian an rawn tlan lovang em ni? Tlan talo se, a changa mawi taka par hluai a, a changa mawi lemlo taka ka par alo chuai thin vang zawk em ni? Kristian thalaite hian rilruah i inzawt theuh teh ang u.

Pangpar te hi mawi takin par vek thin mahse parvul tura an to duhna hmun leh an that duhna hmun erawh siamtu hian alo duang fel thlip thlep lawi si:

Some flowers grows well in hot; some in cold.
Some flowers grows well alone; some in whole.
Some flowers grows well in shade; some in light.
Some flowers grows well in winter, some in summer.
God has kept us in the place, where we'd blossom best.

HMANGAIHNA I TI MAW!!!

2009-07-11T10:40:00.001+05:30

(9th July 2009; 11:30 PM)

“Mihring tawngte leh vantirhkoh tawngtein thu sawi mah ila, hmangaihna ka neih si loh chuan dâr, ri mai mai emaw, dâr benthek, ri mai mai emaw ka lo ni ang. Tin, thu hrilh theihna neiin, thurûk zawng zawng leh hriatna zawng zawng hre vek mah ila, tláng sawn theihna khawp hial rinna famkim nei mah ila, hmangaihna ka neih si loh chuan engmah ka ni loving,” tiin tirhkoh Paula chuan Korinth khuaa mi te hnenah alo ziak tawh a. Lal Solomona chuan, “Tui tam takin a tidai thei lo, hmangaihna zawng, miin a in-ro zawng zawng hmangaih aiah a pêk zawh chuanin hmuhsitin a awm ngei dâwn e,” alo ti ve bawk. He hmangaihna hi eng chiah nge maw alo nih rêng rêng le!? Sual lam ngaihtuah lo va; fel lohnaa lâwm lo va, thutak erawh lawmpui thin a, engkim tuar hrâm hrâm a, engkim ring a, engkim beisei a, engkim tuar chhuak thin HMANGAIHNA hi enge a nihna tak min hrilh thei em?!

He hmangaihna hian mihring chu a nih tûr aia sângah a vawrh chhova; nun neilo leh boral tûr chu nunna pêin a chhanchhuak a. Chutih lai vêkin he hmangaihna vêk hian ani, a nih tûr ang ni phâk lova hringmì pawt hniam thin chu. Hmangaihna avangin thenkhatin lallukhum chhe thei chang tûrin an bei a; a thenin nuthlawi tang bêlin an lallukhum anlo kalsan ve mêk bawk…

Hmangaihna hi engtia lo awm ve ringawt nge? Mihringah eng hun atang khân nge alo awm? Eden huana a hnâra nunna thâw a thâwk luh a, minung alo nih atang chiah khân em ni? Chuti anih chuan mihring hmangaih hmasaber chu Pathian ani ngei ang tiraw? Anih mipa khân hmeichhia a hmuh veleh khân alo hmangaih nghâl em ni’ang? Ni ta se, thlan tûr dang an awm loh vâng a ni thei ang em? Lo ni ta se, inhmangaih lutuk over vak kher lo te kâr a\anga thlahte- khawvêl luah tu te hi kan lo nita tihna a ni ta em ni??

Mihring hmangaihna a dai leh thin kan ti maw? A daih leh si chuan hmangaihna suak ani mai lovem ni? A suak chu lo ni ta se, hmangaihna ah kan chhiar tho ang em? Hmangaihna a dai kan tih hian a aia hmangaih dang thar alo lan ve vang a ni lek thin lo maw??

Hmangaihna hi khawiah nge a awm? Mizia leh nungchangah em ni? Ni ta se, danglam châng nei thin mihringte zîngah hian hmangaih tlâk kan awm thei dâwn em ni?? Hmêlah hmangaihna a awmlo kan ti maw? Anih chuan hmel chu engang fakauva pawimawhlova pawimawh nge alo nih? Huaisenna, taimâkna, lei ropuina leh hausaknaah te hian em ni Hmangaihna hi a awm? Ni ta se, reilotea ral leh mai tûr leh chau mai tûr hringfâte hi hmangaih tlâk pakhatmah kan awmlo tihna ani mai lovem ni? l

Hmangaihna in engkim a beisei mâw? A beisei chu a duhthusâm a ni lekfang lo mâw? Suangtuahna luipuia a pil hmâ chu a beisei chang tûr chuan a bei thiang alawm.. Mahse a beisei chu a thlen phâk leh phâkloh chu a hmangaihah chuan a innghat ve tho bawk lovang em ni?

Lêndun remlo hmangaihna leh chhânletloh hmangaihna te hi tunge tuar thiam ang? Tawrh thiamloh vânga fam khawpui mahni a inlawi chawp ta mai te hi an dawihzep vâng kan ti nge, huaisen kan ti? An dinhmun hriatthiampuilo nang leh kei hian dem thei kan ni rêng em? Hriatthiampui pawh nita ila, chaklohna inanglo hringfâte kan nih avâng hian dem theih an ni meuh maw?
Kei zawng, hmangaih êm mah ila, chutiang êm chu ka thleng ve ngamlo ani - Kei zawng, ka dawihzep êm ani…

Ka hmangaih nên lêndun a rem si lo.. Hmangaihna hi khuanu duan i ti maw? Chuti anih chuan Khuanu chu ka chungah hian a rilru ava chhe ve!!

FRENZO, ADT..

2009-04-03T14:58:00.001+05:30

Hairehai!!! Phai khawlum kalsana zothlifîm dawng zet a zotuithiang han dâwt leh mai chu(h), rilruah nuih ver ver a awl duh khawp mai.. Hei, chu a chhapah ânpai tawngkama “At the touch of love, everyone becomes a poet” an ti mathlâwn lovin Hunpui boruakin min zem lai vêl, lunglên zual laia k’n han ziah chhuah ve ngawt mai te avâng nge ka hrelo!!! Ziak leh rawh tiin min phut ang hlur mai bawk si a; bawl nuam ta chu kan phuan leh buah mai dawn anih hi!! Kan thupui khi mak i ti maithei.. Chhiar zêl la i hre mai ang..

Mizote hi a hnam anga chhût chuan hnam danglam tak kan lo nih hi ka ti ta. Pu Vanneihtluanga sawi ka hre reng thin. Mizote anga heti zat inkhâwm hup hup, heti zat lam mup mup hi khawvêl hnamdang tute nge kan hmuh? Hetiang taka Ringtu ram inti si, kan dinhmun heti mai kan la ni si hi thlir ila, kan hnamah hian engemaw tak thlen tur ala awm ani lo maw? Tunah hian enge kan focus? Kan zirna leh kan khawtlâng, kan sakhua hian enge focus min pek? Focus mumal nei lova tawngpâwng hlim ve tawp kan nih chuan a pawi hle ang tih hriat a hun tawh. Chutiang kan nih chuan ka tâwpna chu a namailo teh ang.

Hetiang taka kan hlim hup hup leh huau huau (a phur falah tang thin mah ila) kan tih nasat lutuk hi chu kan hnam tan a pawi ala hlauhawmin ka hria.. History kan en chuan, mi zâwn inchuh kan hria ang. Khatiang bawh huk policy atang te khan em ni huk huk hi kan thanlenpui te ka tia.. Ni e, a hunlai ngaihtuah chuan a tha vek kan ti ani thei e. Anih engvangin nge reiloteah democracy alo lût dâwn tih hre reng chunga kan lal te kha kan sawi chim rîk ngawt? Haw-hai-haw kan tia, kan sawi chim leh rup-huk-tawp mai ani lo maw?. Engvangin nge kan lehkhathiam pui pui te zalenna suala ramhnuaia an luh huk? Huk bawk ani. Hmânni lawka hmâr nula zaithiam pawh kha, huk bawk. Chiahpuam pawh chuti bawk. Harhna kan tih tamtak te hi huk bawk ani em? Ani chu kan ti phal hauh lovang, mahse engemawchen anih na lai chu a awm ani lo maw? Kan rilru ngheh loh vang em ni zawk ang? Harhna chan tam lamah chuan mizote hi khawvelah chuan a thleng sang pawl tak kan ni. Mahse, heti hi kan la nih hi. South Korea ram kan thlîr chuan Harhnain an ram a tihdanglam dan kan hmu ang. Anih kan harhna te hian engnge kan ram tana thil chhenfakawm a herchhuah?

A hminga hnamdang kâra awm ve ta chu an nuphung kan thlir lo thei lo a, chu mai ni lovin mahni ram nên kan tehkhin lo thei thin si lo. Mak ve ngawt mai! Nungchate hi tawng thei se chuan Mizo Ringtute bula awm ai chuan Hnamdang Ringlomi bula awm an thlan zawk thu an sawi ngei ngei ang. Thilsiam zawng zawng hnena Chanchin Tha hril tura koh kan ni a, mahse chu kohna dawng ve lo zawk te chuan an lo zâwm tha hle zâwk zuk nia!! Tin, sawrkar pisa dâwr dâwn pawhin (Kan) Ringtu rama pisa dawr ai chuan Ringlo rama pisa dawr an nuam zawk zêl tlat. Hei hi keima tawnhriat atanga ka sawi ani. (A zavai angin ka ti lo, mi tha tak tak tamtak chu an awm, a tlangpui/average ani ka sawi ni). Hei hi thil tamtak atanga pahnih chauh mai ani. Sawi vek sen rual ani lo.. Mahse hei kher hi chu i ngaihtuah ngun teh ang u, kan êng chu mi mithmuha êng tur kan ni si.

Thupuiah lût tawh ila!! Social networing site in tunlai kawvelah thalaite min rûn mêk.. Orkut, hi5, facebook, myspace, frenzo, adt… (Adt. tih hi anpai tawnga etc. an tih ang deuha adangte tihna mai ani. Tualchher ani e. Hmang thin ila, kan tawng a hausa leh sawt ang). Tuna kan khawtlanga kan hmuh phak chu Frenzo hi.. Hunawla intihhlim nân kan hmang anih chuan a tha e. Mahse lehkhazir leh hna pawimawh tih thulh nana buaipui erawh a chi loh. ‘f4C (Frenzo for Christ) te kha, Frenzo ah hian thlarauboan tam ania. Tang the u.. Social networing site te hi thalai tamtakin an chhiatpui mek a; Sethlun nula leh tlangvalte erawh hi chuan chhiatpui lohvin a tha zâwngin hman tangkai i tum teh ang u. Hruaitute (Khawtlang/Sakhaw) kovah chu chu awm teh se…

SCIENCE LEH EVOLUTION

2009-03-19T19:51:00.001+05:30

Thlen thlakna la rei loh nen, lung hlui leng thar leh chuan classroom ah pawh chuan kiansan zai rel ta'ng e ti duh si lo; kei lah pek paw'n hnar phal bik hek lo i, tlar hnungber dawttuah chuan (inlak cool tum em em vang pawh ni chuang lovin) thuthmun chu bengbel leh ta in, ngawi reng chuan ka va thu leh ta vun mai chu ania(h)..

Thil danglam em em thleng pawh awm chuang lovin hun chu a kal zel a, Biology period alo thleng ta. A tlangpuia tum dang ang thova boring leh hlau rilru chungin kan hotunu, nu upa lam deuh tawh lo lut chu kan lo wish a, tichuan thuzir chu kan tan ta a..Vawina kan thuzir hi ani, tunhma paw'n lo zir tawh thin tho mah ila, ka rilru rawn deng thar tu leh ka ngaihtuahna kal tirtu chu. Ka thinlung ngaihtuahna min tur ut ut tu leh zana ka pen leh lehkhapuan min chuh tirtu chu vawina kan thuzir ngei hi a ni. Tichuan ka pen chu hum ran chungin lehkhapuanah chuan chu ka rilrua awm chu ka thlasik mau puah chhuak ta mawlh mawlh mai a, he i thu chhiar lai hi alo piang ta ani..

Vawina kan thuzir chu ang dang nilovin Charles Darwin a Evolution theory, tam takin kan hriatthiam dan tur chuan mihring te zawng thlah kan ni tih leh thilnung zawng zawng te hi thlahtu bul pakhat chauh nei kan ni tih thu hi a ni. Thianpa Ch. Zawma te angin (thinrim awih loh..) tawngkam thiam lutuk lovin rilrua awm ang hi sawifiah zo dawn lo tih inhre reng mah ila,,,, Chhiar dan lo thiam mai teh..

Middle leh high school lamah te pawh kan lo zir hrep tawh, mahse kan lo chhiar liam mai mai thin, tuna ka rilru kap tlattu lo ni ta he Evolution theory hian tunlai thalaite (abik takin khawthlang lam) rilruah bu a khuar nghet tawh hle tih hre phawt ila; keini Mizo Kristiante pawh hi reiloteah min la phin darhin minla chawk dal mai ang tih hi a hlauhawm a ni.He Evolution theory, nunna nei khawvela awm zawng zawng te hi thlahtu bul khat atanga chhuak/piang kan ni; tih leh keini ringtute'n kan Rin, Khawvela thil awm zawng zawng te hi Pathian siam kan/an ni, tih te hi thu inkalh tlat a ni. Chuvang chuan lo do let hi Ringtute tan chuan tihmakmawh kan chunga innghat a ni.

Engtin nge kan do let ang? (Khap tamna ramah cheng mah ila(?)), he thil kher hi chu Scientific theory anih avang leh a vuakthlakna tur Scientific theory rintlak dang ala pian rih loh avangin khap ngawt chi chu anih hmel loh a, a tiha tih chi pawh a ni kher lovang. Mahse, ar talh dan chi khat chauh a awm lo. Nu leh pa te chuan kan fate'n engnge sikulah an zir kan enpui thin tur ani a, Rinna kalh thil a awm anih chuan Pathian thu, Bible leh tawngtaina nen kan khalh ngil tur ani. Chutiang chiah chuan he thil pawh hi Kristiante Rinna kalh chiang bang anih avangin Thudik zawk theih tawpa kan inzirtir a ngai a ni. Tin, thil hrethiam chin kan nih tawh chuan (ka tih awmzia chu- thalaite'n) sikul etc. a kan zirlai te hi Pathian Thu nen a inman em? Nge a inkalh zawk? Kan ngaihtuah ngun thin tur a ni a; chumi tur chuan Bible kan kawm nel a ngai hle a ni.

Evolution theory in a sawi leh pakhat chu mihringte leh tuna khawvela chengte hi engtin-tin emaw, hun lo inher danglam leh boruak lo inthlak kual vel atanga tihpalh thilthu a lo piang ve mai kan ni tih hi a ni. Hei pawh hi thu belhchian dawllo leh bawk a ni. Mihringte leh thuilnung reng reng timur (cells) a chrosomes, DNA etc. te hi awmze neia hnathawk thei tur chuan awmze neia an inrem thlap a ngai a, hei hi tihpalh thilthu mai chuan awmze neia an inremkhawm theih chu a rinawm loh ani. Chuvang chuan fing taka remkhawmtu A awm tih hi a chiang hle a ni.Evolution theory rintlaklohna enitirna/entirtu tur tam tak a awm a, sawi kher hrih lo mai ila. Kan zirlaiah a lo awm anih pawhin Pathian min hnaih tirtu leh Pathian themthiamzia leh finzia min hriatchiantirtu leh min zirtirtuah hmang thei hlauh ila tih hi duhthusam, a hlawhtlinna ban phak leka awm a ni e..

My Love Letter

2009-01-04T20:12:00.001+05:30

Hringnun lamtluang hnutiang mual liam tur te ka dawn kir a; Sakhmel tawnloh 'D', eng hiang nge maw i zuna min phuar bet tlat - ka hrethiam lo. Ka hringnun beiseina kawl min chhit en sak a; Nang nena buaina leh harsatna tinreng hmachhawn ka inhuam asin. Thil dang engmah reng ka thlang lo- Nang- Ka duh ber chauh loh chu. I tello chuan maw, ka nun hian awmzia reng a nei mawlh lo. I awm loh chuan maw, chhum hian ka tan sawi a nei lova, zan pawh lunglen tizualtu mai a ni si; kawla turnipui tukchhuaka lo her chhuak hian ka tan engmah a rawn herchhuah pui ve lo tih ka hria asin.

Kan lenna khua hmun lo mah ni se, kan thinlung erawh daidarh theih hauh lova awm dun reng turin Pa ka dil thin. Tuna tuantul vanga tuanna tlang dang rih mai hi nakina kan hlim zawkna tur a ni tih i hriat ka duh takzet a ni. Theih ni se i kianga len a i biang mittui lo luang thin chu duat taka hrukhulsak che pawh ka duh hle thin. Theih ni se lunglen hrelo tura kumtluan atan kan run in tlawm te a runlum nuthai chang atan pawh kan iai lo che asin. Chutin hallo te a chawnbana inkaiin lungkham dang reng nein lovin kan leng dun anga tiin duhthu ka sam ve a.

Ariang ka chan min dawnpui ve la; rinawm taka i parmawina ka tan chauh vawng nung reng turin ka sawm bawk a che. Chutin dar ang tawn ni herchhuah hma zawng kei pawn ka thianghlimna chu ka hmangaih ber- i tan chauh ka lo vawng reng ang tiin ka intiam hial ang.

A tawp nan chuan maw, KA BAWIHTE, nang chauh lo chu dawn reng neihn a har ngei e. Tawnloh kara tang dang min her san ka hlau thin e. Mahse hei erawh nghilh hauh suh ang che:

Ka thlang tawh che a,
Ka thlahthlam tawp lovang che.
Beiseina min siam tawh a,
Nangmahah ka beidawng ngai dawn lo.

Ka hmangaih che a,
Ka hmangaih reng thin ang che a,
Ka hmangaih kumkhua bawk ang che.

(Kumhlui thlah zan chu lungleng takin mahniin inah ka hmang ve ang ren rawn a, rilrua lunglennain a rawn den hmang chuan pen leh lehkhapuan chuhin,, ziak chhuak ve ta rawih mai le. Ziahchhan ka neih leh neihloh chu,, i ngaihdanah a innghat..hehe)

Krismas nang nen

2008-12-30T22:33:00.001+05:30

(Khawpuiah Krismas)

Kumpuisul lo veiin ‘ber’ thla kan chuang kai a; sikni kawl lo eng leh chuan boruak thiang leh nuam tak a rawn herchhuah pui leh ta. Zirlai tam zâwk te chuan kâwla nichhuak chhiara an beih rah an seng tawh a. Kûtpui liantham dang neilo Zofate’na kan nghahhlelh leh tlumtea thlîr taka kan thlir kan kûtpui chu ban phâk lawkah a rawn in chhawp hnai leh ta. Tuantul vanga hometown boundary pela ramchhuak te pawh chhungkhat laina thenrual tha te (duh ber te pawh a ni tho ang chu, tiraw, U Maruat!!) nêna he kût lâwm tûr hian mahni rûn pui theuh an pan ta sang sang mai. Chutih laiin keini erawh – kan lo heti ta chu a nih si hi.

Hlim taka chi leh kuangte nene hman loh hlauin tam tak an phusa suau suau a; haw na tur ticket chan loh hlauh vanga kum laihâwl atang daih tawha lo in hmâkhua lâwk pawh tam tak an awm. Khawchhak mifingte’n nausên chibai an bûk laia an thilpek ang kha chu tluk dawn lo tih hre reng mahsela mahni duh ber te hmangaihna thilpek hawnsak tur ngaihtuaha chhun ni sensa leh zan khaw tairek thleng thlenga dai kil kawlm kar hrut zak zak tawk lah bo lo. Chu achhapah mahni haw theih dawn loh vanga duhtakte thawn tur buaipuia thiante haw tur be tlawn kual zak zak pawh bo lo (kei chu ka ni ve lo!! V-tei kha lo zawt mah rawh u!!). “Right to Equality (mitin intluktlanna dan) hmanna ramah meuh pawh kan hunpui zet zawng, mitin min nghawng dân a rualkhai lo hle mai.

Siampuii Sailo leh Lalsangzuali Sailo te’n thinlung Bethlem leh kumhlui ngaih lamah min tuan pui a. Chutih laiin Kenny Rogers-a leh Dolly Parton-i te chuan an inhmangaihna chu he hunpui chhunga/laia an thilpêk dawn te zinga ropui ber leh sang ber niin an sawi a; hetih lai vek hian Elvis Presley-a ve thung chuan, “I tello chuan maw, Bawihte, hunpui hlimna leh a mawina zawng zawng te hi ka tan chuan engmahlo mai a ni. I tello chuan Mas nuamlo ber a ni, ka hman dawn ni,” tiin a lo in chham lungleng ve mek bawk. Mariah Carey-i’n, “Tun Mas chu ka lo haw ngei ngei dâwn e; min lo beisei dâwn nia,” tia a thenrualte hlim taka tawn hun a nghahhlelh laiin Blue Corn erawh chuan, “Tuanna tlang a dang ta si. Theih chang ve se nang nena Krismas hman dun ka nuam,” tiin an lo luangliam ve thung. Miley Cyrus-i’n, “Mas thilpek atana ka duh ber chu nangmah i ni,” tia a duhtak alo chhai lai mekin tu emawni chuan, “Hlim taka Mas chibai ka buk theih nan che ka duh ber chu ka hahmai bal hi lo to se tih hi ani,” tiin duhthu alo sam ve mek bawk a; chutih lai vêkin Debbie, Grace leh Joseph te chuan an nu pek tur kawrmawi Rs.10 a leitir turin dâwrkaipa an lo dawn ve mek bawk.

Hranghlui te’n Bethlehem ngaia an lunglên laiin thangthar dâwn tawi te chuan ruaitheh, ride (‘fawr’ tih thumal kha ‘ride’ tiin an thlâk tawh aw, Zawma!) leh kumhlui thlah zân chu an lo engto ve ber niin a lang a. Kohhran Kawmiti in ruai sâ tûr bâwng/vawk talh tur an rêl laiin Mualkil Thianzaho Kawmiti chuan kumhlui thlah zâna âr kan tûr an lo rêl ve mêk bawk (A tîra rel fel loh chuan…..nula pahnih chauhin….an kang…..Zami zawt mai ruuu…!!).

Nausen Lal Isua chibai bûk nâna tam takin he hun hi hman an tum laiin a hawklak rual thenkhat chuan halpuah, halmawi, thil thar, ride, âr kan etc. tih vel bak an ngaihtuah lêmlo niin a lang si. Tam takin Lal Thar lo piang nêna hman an tum mêk laiin thenkhat chu Asia rama an duh ber te nen an hman theih chuan an lung a awi mai si. Lênna tlâng dan vânga duhber hmanpui theih dawn loh vanga Blue Christmas hmang tur pawh an kat nuk chu anih hi- he khawvel ram zauah hian. Amaherawhchu Thlarau mi te’n an nghahhlelh tluk zetin Tisa mi te pawhin an nghakhlel ti ila kan sawi sual tam lua ta lo ve ang. (Hmm... kan ti lutuk mah mah em aw?? Minlo dêng hlum êm lovang chu maw!!)

Thlasik buruak pawh a mi hmer a na sâwt ta khawp mai. Suangtuahna lamah chuan thianzahovin meipui leh zai tuah kan lo rem a – a tak ramah erawh hnamdang kara zanriah kil ve mai kan ni si. Suangtuahna lamah chuan tuantul vanga rei tak lo in then darh tawh te hunpui lawm changchawiin lo in tawk khawmin lungkham leh engto dang reng nei lovin chanchin kan in hrilh tawn sap sap a – a tak lamah erawh mahriak te a laikhum belh zai rel a la ngai thin si. Kum liamta te leh hunpui liam ta te dâwn kîr chungin lenrual te nena kan tuanna thin tlang leh mual te chu rauthla in ka fang leh a, mahse reilotea’n lunglen tizuala’n a thamral leh mai si.

Pawltlak chhawrthla eng no nghial leh thangvân dumpâwl thiang vûk mai chuan (Chhuihthangvala chu) mi u te lenna ram a ngaihtir ve khanglang chu anih si hi. “Dam leh tlang khatah; thih leh ruam khatah,” tia thlahtute thuvawn chu a zawm lo ber ni hial âwma mawi a ni. Rilruah Bethlehem pawh lang thei hauh lovin tlangval-a-pumpa “Krismas nang nen” tiin a luangliam a. Di ngaih tur tawng ta lo nafam chu Hmangaih Zoram zun ngaiin a kur nghial anih hi (Tunge Chhuihthangvala chu??? Ka sawi lovang).

Rem Lal pian champha-ah hian thiante chuan ram râlmuangah hlim tak leh hlauhthawn/engto nei hauh lovin an hmang anga; keini erawh chu Bomb puak victim member titamtu nih hlau reng rengin kan hunpui kan tlingtla ve dawn niin a lang si. “Tuanna tlang lo dang hi a pawi ber mai” tih bâk sawi tur leh inhnemna tur a awm ve tawh si lo.

“Dam te’n Khuanu zarah leng zel ila;
Kumpuisul lo vei leh hnu chuan
‘KRISMAS - NANG NEN’
kan hmang ve thei tawh mahna”

tiin ngai chung zêlin THLUNKHAWPUI unaute Mas chibai tha ber ka buk a che u.

(This article was published in HLIMNA weekly, of our locality - Sethlun. It is of an immense sentimental value to me, 'cos it's the first article i wrote.)